 |
| Sanata Abdulaziz Yari |
Daga Abdullahi Alhassan, Kaduna
Shugabancin babbar jam’iyyarmu ta APC wato All Progressives Congress, tare da fadar shugaban ƙasa, sun sanar da kafa Kwamitin Yaƙin Neman Zaɓen Shugaban Ƙasa na 2027, domin sake zaɓen Shugaba Bola Ahmed Tinubu da Mataimakin Shugaban Ƙasa Kashim Shettima.
Kwamitin ya ƙunshi manyan ’yan siyasa da sauran fitattun mutane masu nagarta da kwarewa, inda aka naɗa Sanata Abdul’Aziz Abubakar Yari, Marafan Sokoto, a matsayin Darakta-Janar na kwamitin.
Dangane da wannan gagarumin ci gaba, a matsayina na ɗan jam’iyya mai kishin ci gabanta, kuma ɗan Najeriya mai alfahari da ƙasarsa, ya zama wajibi in bayyana matuƙar godiyata ga Mai Girma Shugaban Ƙasa, Bola Ahmed Tinubu, GCFR, bisa wannan muhimmin mataki na siyasa.
 |
| Dr. Sani Abdullah Shinkafi |
Dr, Sani Abdullah Shinkafi Wambam yabawa Mai Girma Shugaban Ƙasa bisa naɗa mutum mai cikakkiyar, gogewa da ƙwarewar siyasa, tare da amana da biyayya, domin jagorantar wannan muhimmin aiki na ƙasa. Wannan naɗi ya ƙara tabbatar da jajircewar Shugaban Ƙasa wajen tabbatar da haɗin kai, bai wa kowa dama da kuma amfani da ƙwararrun ’yan siyasa wajen tafiyar da harkokin jam’iyya da ƙasa baki daya.
Domin bayyana irin gagarumar gudummawar da Sanata Yari zai iya bayarwa wajen tabbatar da nasarar sake zaɓen Shugaba Bola Ahmed Tinubu, ina so in jaddada wasu muhimman abubuwa kamar haka:
Gadon kyakkyawar Tarbiyya
Domin fahimtar dalilin da ya sa Sanata Yari ya dace da wannan babban aiki, ya kamata a duba irin gida da tarbiyyar da suka gina halayensa.
An haifi Sanata Yari cikin gidan mutunci da martaba gidan marigayi Alhaji Yari Abubakar, Allah Ya jiƙansa. Marigayi Alhaji Abubakar Yari mutum ne mai tawali’u, amana da kishin jama’a, wanda ya taɓa zama ɗaya daga cikin masu ruwa da tsaki a Majalisar Masarautar Talata Mafara ta Jihar Zamfara.
Dr, Sani Shinkafi ya kara da cewa Saboda haka, Sanata Yari ɗa ne daga cikin gidan iyalin Kayayen Mafara, waɗanda suka shahara da mutunci, ilimi, hidimar al’umma da kishin ci gaban ɗan Adam. Sunan Kayayen Mafara ya kasance abin da ake danganta shi da gaskiya, tawali’u da sadaukar da kai wajen yi wa jama’a hidima. Waɗannan su ne kyawawan ƙa’idojin da Sanata Yari ya tashi a kansu.
Dr Shinkafi Tun daga ƙuruciyarsa, ya samu tarbiyya mai coke da ilimin addinin Musulunci da ilimin zamani. Ya koyi akidar gaskiya, mutunta mutane, ladabi da ɗaukar nauyin al’umma. A lokaci guda kuma, ya ci gaba da karatunsa na zamani har zuwa matakin Masters degree a Jami’ar Salford, inda ya samu ƙarin fahimtar tsarin shugabanci da tafiyar da harkokin gwamnati na zamani.
Wannan tarbiyya da ilimi ya taimake sa wajen gina shi a matsayin jagora mai kyawawan ɗabi’u, imani, hikima da ƙwarewar aiki.
Tafiyar Siyasa Daga matakin kasa Zuwa Matsayi na kasa
Tafiyar siyasar Sanata Yari labari ne na ci gaba a hankali daga matakin ƙasa har zuwa babban matakin siyasar ƙasa. Bai shiga siyasa ne bisa kuskure ko sa’a kawai ba; ya fara ne daga tushe a Jihar Zamfara, inda ya yi aiki tukuru a matsayin Sakataren Jam’iyya, sannan daga baya ya zama Shugaban Jam’iyyar All Nigeria Peoples Party (ANPP) a jihar.
A matsayinsa na Shugaban Jam’iyyar ANPP na Jihar Zamfara, ya jagoranci wani gagarumin kamfen da ya taimaka wajen tabbatar da sake zaɓen Mai Girma Sanata Ahmad Sani Yariman Bakura a shekarar 2003. Wannan nasara ta tarihi ta ƙara fito da shi fili a matsayin ƙwararren mai tsara harkokin siyasa da kuma jagoran kamfen mai basira.
Daga baya, ya zama Ma’aji na Ƙasa na ANPP, inda tasirinsa da gogewarsa suka ƙara bunƙasa. Daga waɗannan matakai na farko, tasirinsa ya yaɗu a faɗin Arewacin Najeriya, daga bisani kuma ya kai matakin ƙasa baki ɗaya. Ya gina ƙawance masu ɗorewa, ya taimaka wajen horar da matasa da sabbin shugabanni, tare da samun amincewar jama’a saboda kasancewarsa kusa da talakawa da sauran al’umma.
A fannin majalisa kuma, ya ƙara samun gogewa wajen fahimtar buƙatun ’yan Najeriya. Daga shekarar 2007 zuwa 2011, ya kasance ɗan Majalisar Wakilai ta Tarayya, inda ya wakilci mazabar Anka/Talata Mafara Federal Constituency. Wannan gogewar ta ba shi damar fahimtar buƙatun al’ummar Najeriya daga matakin tarayya.
Ginshiƙin Ƙarfi a Siyasa da Shugabanci
Kamar yadda Allah Ya ƙaddara, a yau Sanata Yari ya zama ɗaya daga cikin manyan ginshiƙan siyasa a Jihar Zamfara, Arewacin Najeriya da ma ƙasar baki ɗaya. Wannan ya samo asali ne daga kyakkyawan tarihin aikinsa a fannin dabarun siyasa, haɗa kan jama’a da tafiyar da mulki.
Sanata Yari yana da cikakkiyar fahimta game da tsarin jam’iyyun siyasa, rawar da masarautu da sarakunan gargajiya ke takawa, da kuma ƙungiyoyin mata da matasa. Yana da kyakkyawar hanyar sadarwa da masu ruwa da tsaki a dukkan jihohin Najeriya. Irin wannan tsarin sadarwa da ƙwarewa shi ne ke mayar da goyon bayan siyasa zuwa sahihin sakamakon zaɓe.
Dukkanmu muna sane da irin ƙoƙari, gwagwarmaya da sadaukarwar da ya yi a lokacin da ake kafa jam’iyyar APC. A lokacin da yake Gwamnan Jihar Zamfara, ya ɗauki matakin jajircewa wajen jagorantar kafa da bunƙasa APC a Jihar Zamfara.
A wancan lokaci, yana cikin gwamnoni masu adawa da tsarin da ke mulki a tarayya, amma ya kasance a sahun gaba wajen shimfiɗa tubalin jam’iyyar APC a jihar, wadda a yau ita ce ke jagorantar gwamnatin tarayyar Najeriya.
A yau, a matsayinsa na fitaccen Sanata a Majalisar Dattawa ta 10, Sanata Yari na daga cikin manyan masu ruwa da tsaki da ke ba da gudummawa wajen ƙarfafa nasarorin da aka samu ƙarƙashin Ajandar Sabon Fata (Renewed Hope Agenda).
Saboda haka, ina da yakinin cewa Sanata Yari zai iya jagorantar Kwamitin Yaƙin Neman Zaɓen cikin inganci, tare da haɗa kan ’yan jam’iyya da sauran masu ruwa da tsaki domin tabbatar da sake bai wa Shugaba Bola Ahmed Tinubu da Mataimakinsa Kashim Shettima damar ci gaba da jagorantar ƙasar nan.
Ina kira ga dukkan ’yan jam’iyyar APC, masu ruwa da tsaki, da kuma dukkan ’yan Najeriya masu kishin dimokuraɗiyya mai ɗorewa, ci gaba da bunƙasar ƙasa da kyautata rayuwar al’umma, da su bai wa Kwamitin Yaƙin Neman Zaɓen da Sanata Yari ke jagoranta cikakken goyon baya da haɗin kai.
Muna da cikakken yaƙinin cewa, a ƙarƙashin jagorancin Sanata Abdul’Aziz Abubakar Yari a matsayin Darakta-Janar, Kwamitin Yaƙin Neman Zaɓen zai kasance mai tsari, ladabtarwa, jajircewa da mayar da hankali kan aikinsa, tare da tabbatar da gagarumar nasara ga tikitin Tinubu/Shettima da jam’iyyar APC a zaɓen shugaban ƙasa na 2027.